आखोंकी गुस्ताखीया...
सध्या माझे माझ्या बायकोशी डोळ्यांच्या भानगडी चालल्या आहेत, चोरट्या नजरा-नजर, नैन मिल गये है वगैरे. आता तुम्ही म्हणाल काय हे '३ वर्षाचा मुलगा आहे आणि हे शोभतेय का?' किंवा 'दुस़ऱ्याची तयारी वाटते??' अहो पण तसे काही नाहीये, माझ्या बायकोला 'डोळे आले आहेत'. आता शास्त्रीय भाषेत त्याला काय नाव आहे ते माहीत नाही पण त्याची लक्षणं म्हणजे 'डोळे लाल होणे, डोळे झोंबणे, डोळ्यातुन पाणी येणे वगैरे.
हा आजार संसर्गजंन्य आहे असे ऐकुन आहे. खरं तर अगदी नजरेला नजर न देताही
केवळ सहवासाने हा आजार होऊ शकतो, पण लहानपणापासुन हे डोक्यात बसले आहे की
डोळ्याला डोळा भिडला की जंतुसंसर्ग झालाच. म्हणजे ते 'चंद्रकांता' मालीकेत
डोळ्यात डोळे घातले की ते जादुचे निळे/हिरवे किरण कसे इकडुन तिकडे जायचे
तसेच. त्यामुळे मी आपला नजरा-नजर टाळतोच. तिच्या समोरुन जाताना उगाचच
मोबाईलवरचा मेसेज वाचतोय, किंवा खाली काय पडले ते उचलुन पुढे चाललोय वगैरे
प्रकार करतोय. थोडक्यात काय तर आखोंकी गुस्ताखीया चालले आहेत बाकी काही
नाही
